متدينين من غير إيمان

كان عندي شك ان المصريين ممكن يثوروا في يوم من الأيام. لكن الايام اللي فاتت اثبتت عكس اللي كنت متخيله. فالمسيحيين هبوا واتنفضوا واتظاهروا ضد الزواج التاني1 و ظهرت مجموعات على الفيس بوك تهدد وتتوعد اي حد عايز يغير حرف من الانجيل. ومن ناحية تانية، ماستحملش المسلمين ان الانبا بيشوي يتساءل إذا كان في آيات من القرآن ممكن تكون اتضافت في وقت متأخر، وهما كمان هبوا واتنفضوا و رفعوا الأحذية2 – ويبدو ان رفع الأحذية بقى أحد التقاليد الهامة خاصة بعد ما ترفع الحذاء تحت قبة البرلمان على ايد النائب الاخواني أشرف بدر الدين. مين بقى اللي قال ان احنا مش ممكن نثور

الشعب المصري من اكتر الشعوب تديناً بحسب استطلاع عمله معهد جالوب الامريكي، واتنشرت النتايج بتاعته سنة 2009، و ده بيفسر مظاهرات المسيحيين والمسلمين في مصر، واللي بيحاول كل واحد فيها يدافع عن عقيدته وعن كتبه السماوية!! لكن الغريب في الموضوع، هو إزاي يكون عندنا القدرة دي على انه نثور و ندافع عن عقائدنا واحنا مش قادرين ندافع عن محمد اللي اتخطف من الحارة قدام عنينا واتبهدل ظلم في قسم الشرطة أو ندافع عن حق جرجس اللي غرق في مركب و هو بيحاول يهرب على ايطاليا. السؤال اللي محيرني هو إزاي ممكن ندافع عن كلام الله وندافع عن الله اللي احنا مش شايفينه، واحنا مش قادرين ندافع عن أخونا اللي شايفينه. إزاي ممكن نكون في نفس الوقت متدينين و كلنا إيمان بالله، واحنا ماعندناش إيمان بالإنسان وبقيمة الإنسان

ملحوظة: مش لازم نعمم الحالة دي على كل المصريين، لسه فس مصريين مؤمنين متدينين يؤمنون بالانسان و بكرامة الانسان

الصورة: منارة ومئذنة داخل دير سانت كاترين - سيناء

1_ مظاهرات ضد الزواج الثاني

http://www.youtube.com/watch?v=X-FLRS_WHhk

2- مظاهرات ضد البابا شنودة

http://www.youtube.com/watch?v=0ZosUO2NWms