ثورة 25 يناير 2011

النهاردة 30 يناير 2011، الساعة حوالي واحدة الصبح. ومهما كانت النتايج، ومهما حصل، عايز أقول إني فخور بإني مصري، وإني فخور بكل المصريين، فخور بكل شخص حاول يقول لأ للفساد وللظلم وعدم العدالة. فخور بكل شخص حاول يكسر حاجز الخوف علشان بلده وعلشان الناس اللي حواليه. فخور بكل شخص كتب كلمة، كل شخص نزل الشارع، كل شخص دعا من قلبه ...حاسس لأول مرة ان الناس اللي غرقت في العبارة، والناس اللي ماتوا تحت الصخور في الدويقة، والشباب اللي غرق وهو بيحاول يهاجر من مصر، وكل اللي اتعذبوا وماتوا في أقسام الشرطة... حاسس ان كل الناس دي دمها مارحش هدر. علشان كده مهما حصل بكرا، وسواء نجحنا أو لا، ومهما حاولوا يقولوا ان الحصل ده كان فوضى، أنا فخور ومؤمن بكل مصري. تصبحوا على وطن

الفوضى

الفوضى هي إنه يموت 1000 شخص في العبارة من غير مايتحاسب حد

الفوضى هي انه اتوبيس يتقلب في الصعيد بسبب السيول ويموت 45 شخص والناجية الوحيدة تقول انها فضلت متعلقة في صخرة طول الليل لغاية لما لقت حد ينقذها الصبح

الفوضى هي ان الناس تشرب من ميه مخلوطة بمية الصرف الصحي

الفوضى هي أن أكتر من 8000 شخص يموتوا سنويا في مصر بسبب حوادث الطرق

الفوضى هي انك تلاقي المرضى نايمين على الأرض في الطرقة في مستشفى المنيا الجامعي

الفوضى أن جماعة صغيرة تتحكم في كل ثروات البلد، في الوقت اللي فيه غالبية الناس بتحارب علشان تفضل على قيد الحياة الفوضى انه ينتحر عمرو من على كوبري قصر النيل ويموتوا الناس وهم خارجين من الصلاة في الاسكندرية

الفوضى هو انه يتسرق منك بلدك وتتحول كل الأماكن اللي كنت بتحبها لكابوس

الفوضى انه حد يحكمنا 30 سنة وبعدين يورثنا لابنه

الفوضى هي انه الكنيسة والازهر يساندوا نظام بيهين كرامة الانسان كل يوم

الفوضى هي انه نسكت

اللي بيحصل النهاردة ده مش فوضى، دي محاولة لتصليح الفوضى اللي موجودة فعلا

هل هاننجح؟ مش عارف! بس عارف انه لازم نحاول علشان خاطر الناس اللي مالهاش صوت، علشان خاطر الناس اللي ضحوا بحياتهم علشان البلد دي، علشان خاطر الناس اللي فقدت اي معنى للحياة، نحاول علشان خاطر الإنسان